Gaza ki Pukaar by Maliha Jabeen

حضرت سلیمان علیہ السلام نے 957 قبل از مسیح میں یہاں عبادت گاہ بنائی جسے یہودی ہیکل کہتے ہیں جبکہ ہماری روایات میں اسے مسجد اقصیٰ کہا جاتا ہے۔ اس مقدس سرزمیں کو فلسطینیوں کے خون سے رنگنے اور قبلہ اول کو مسمار کرنے کی سازشیں 76 سال پہلے سے ہی ملتی ہیں۔ نہتے فلسطینیوں کی جانیں تب سے ہی گروی ہیں جب سے انہوں نے لٹے پٹے صیہونیوں کو اپنے ہاں ٹھکانہ دیا،بجائے عاجز ہونے کے وہ تو غاصب ہوگئے۔پانچ ماہ سے مسلسل فلسطینی اپنی بقاء کی جنگ کے لیے بنا تھکان کے ،سینے میں جذبۂ ایمانی اور توکل اللّٰہ کے گلدستے سمیٹےجدو جہد کر رہے ہیں۔ اور ہم ،ہم اسلامی ممالک، ہمیں انکی چیخ و پکار کہاں سنائی دے رہی ہے۔ کیوں کہ جب دلوں پہ پردہ پڑ جائے پھر سامنے کی چیز نظر نہیں آتی اور کان پڑی آواز سنائی نہیں دیتی۔آج ہم اپنے گھروں میں خواب خرگوش کے مزے لوٹ رہے ہیں اور غزۃ کے باسی کھلے آسمان تلے مسمار ہوئے گھروں کے ملبے پر اپنے اپنے پیاروں کے اعضاء ڈھونڈ رہے ہیں۔ہم انسان ہیں کیا؟ ہماری انسانیت،غیرت نجانے کہاں جا سوئی کہ ہماری بہن بیٹیاں وہ اسلام کی شہزادیاں جو مستورات ہیں، چھپی ہوئی ہیں، آج بےآبرو پڑی ہیں۔ کوئی محمد بن قاسم ان کی پکار پر لبیک کہنے کی سکت نہیں رکھتا۔وہ ننھے بچے جو بن کھلے مرجھا گئے کل کو یومِ حشر ہم نام نہاد مسلمان ان کا سامنا کیسے کر پائیں گے کہ ہمیں اپنی جانیں،سکون اور دنیاوی امارت پسند تھی؟ ہم آخرت کو بھلا بیٹھے تھے؟ منکرِ حساب ہوگئے تھے؟ اس لیے تمہاری مدد کو نہ آ سکے؟ مسلمان تو ایک جسم کی مانند ہیں نا تو جب جسم کا ایک عضو تکلیف میں ہو تو دوسرا عضو کیسے خوشی سے سرشار ہو سکتا ہے؟ اس کے پاس پُرسکون نیند کی دیوی کیسے پھٹک سکتی ہے؟ وہ کیسے دشمنوں کے ریستورانوں میں صرف زبان کے چسکے کے لیے اپنوں کی موت میں اپنا حصہ ڈال سکتا ہے؟کیونکہ مسلمان تو ایک جسم کی مانند ہیں اور ایک جسم تو دوسرے اعضاء سے غافل نہیں ہو سکتا۔ پھر ضرورت ہے ہمیں غور کرنے کی اپنے اندازِ مسلمانی پر۔نہیں نہیں، اگر اب بھی غزۃ کی پکار سنائی نہیں دیتی تو ہمیں نظرِ ثانی کی ضرورت ہے، اپنے ایمان پر ،اپنے مسلمان ہونے پر۔اہلِ غزۃ تو اپنا سب کچھ دین پر قربان کر کے سرخرو ہو چلے، کھائی تو ہمارے آگے ہے۔امتحاں تو ہمارا ہے اب۔

 شکوہ نہیں کافر سے کہ وہ ٹھہرا جو کافر ۔۔

تم لوگ تو اپنے تھے مسلمان تھے آخر ۔۔

کچھ کرنے سے کچھ کہنےسے کیوں تم رہے قاصر ۔۔

مظلوم سے تھا بغض یا ظالم کے محباں ۔۔

درجات کی سیڑھی پر ہم جب چڑھیں گے

بارگاہ رب میں اک عرض کریں گے 

ہم کٹتے رہے اور تھے خاموش مسلمان

تم لوگ تو اپنے تھے مسلمان تھے آخر

 ملیحہ جبیں